Santu Mamilianu

Parechji sò i paesi di Corsica Suprana à cunnosce l'esistenza di stu santu, sia da una pittura, sia da una antica cappella rumana, sia da un ricordu più o menu liatu à l'isula di Monte Cristu ...
Ma di più chè tuttu què, u so nome ci ricorda un passu di a Storia quandu a Corsica intratenia raporti stretti è cutidiani cù u so embiu naturale, tirrenu è tuscanu, d'isule è di cuntinente cusì vicini, è oghje cusì scunnisciuti.

À l'epica pisana poi ghjenuvesa, eranu putentissime l'abbazie di Monte Cristu o di Gorgona, è da tamanta venerazione ch'elle suscitavanu, numerosi funu i Corsi è i Sardi à fà li dunazioni di terre è di beni.

U cultu di Santu Mamilianu era dinò cumunu da una sponda à l'altra di u Tirrenu, finamente à a Sardegna, è l'isula di Monte Cristu era santuariu è locu da peregrinagiu per tutti quanti.

Racugliendu tuttu ciò chì si sà nant'à Santu Mamilianu, aghju vulsutu fà sparte à i Corsi a cunniscenza di un pezzu tamantu di u nostru passatu.
Santu Mamilianu in l'isule tuscane (ducumentu pdf di 4,3 Mo)